من وحي الصورة ( لما تسأل عني مصر ) لما تسأل عني مصر؛؛ قولوا ليها إني إندفنت... وإني معصور فيها عصر... وإني ياما عليها هونت... كلموها تملي عني.. وإحكوا ليها عن ولادي... عرفوها بجد إني.. مش بأكلهم زبادي... مش معايا حق بامبرز... ولَّا عيش حاف حتى عادي... في المشاكل عادي باغرز... مره مغروز في الطابور... لأجل رغيفين عيش بنادي... وف طابور مصلحتي واقف... عايز أخلص مستند... روحي طلعت م العقد... حد جنبي مال وقال لي... لو تعبت من العدد... يبقى لازم وقتي تِبْرِز... هي ماشية يا سيدي رشوة... عادي يعني حق عشوة... لو هتدفع بدري تنجز... وإن ما خلصتش تهاتي... تبقى ع الحال ده يوماتي... لما تزهق من حياتك... زي ما زهقت في حياتي... وعادي تعبان بس بادفع... هو بقى في حاجة نافعه... لما دي رُخْرَىَ هتنفع... كلنا مساكين أخرنا... للرحيم إيدنا بنرفع... لما تسأل عني بلدي... قولوا ليها.. توهت فيها... وعجبي ياما في أمرها!!! ما بقتش أحس بطعم حلو... من كتر شربي في مرها... ليه خيرها تاه من وسطنا... ما فضلش ليه غير شرها؟؟ ولا لاقي فيها علام عدل... ولا هدمة تستر جتتي... ولا لقمة تتاكل بنفس... وعلاج يعالج صحتي....