#حكاوي زمان

حكاوي زمان
قصيدة عامية بقلم: صلاح منير

زمان كان البيت مفروش دفا وحب وود
عيلة  كبيرة تتجمع على سفرة أو طبلية
أولاد وأم وأب وكمان معاهم جدة وجد
ما يهم ايه في الطبق  بصارة ولا لحوم مشوية
وريحة الطبيخ عند الجيران فايحة للأنوف بتشد
وعشان م كانت القلوب بيضة صافية ونقية
طبق من كل بيت تلقاه على كل البيوت بيمد
لقمة هنية يا أم حسين تكفي م العدد مية
يدوق أبو حسين الصنف ويقدم لله الحمد
ويا أم حسين اياك ترديها فاضية الصنية
والصبح الكل على شغلة  الرحال بيشد
 واللي على مدرسته ماشي يشب ويلب
بمليون صباح بتتقابل وميت مليون تحية
بعد العصاري في الريف المسطبة بتتمد
وفي المدينة بالفرندة محلاه شاي العصرية
هات يا حديت ومناقشة وكلام وجذب وشد
والضحكة في العالي رغم الشقى النفس مرضية
وكل قاعدة ولها كبير بيحكمها كلمته ما بتترد
حكيم وعادل بتدبير وحزمه شديد وقلبه مليان حنية
لو فيه فرح أوعيد ميلاد الكل شركة ما يتأخر حد
يتلموا عائلات وأولاد لا فرق بين مسلمة ومسيحية
زغاريد وهيصة وطبل وزمر للصبح السهرة بتمتد
شربات وأكل وحلويات لا في ده عليك ولا ده عليا
كانت الحياة طعم البمبون واللي معاه جيبه بيسد
شوف انهاردة بقى حالنا ايه لا فيه أدب ولا تربية
وكل واحد في جزيرة بعيد عن أخوة بيعامله كند
وللمصالح يعرفوا بعض وفي الزنقة أجدع هربنجية
ودول غلابة ومحرومين يتوسلوا .. فيهم ما يسأل حد
ودول شطارة في لم القرش يكومه ويصبحوا مليونيرية
طقيت يا ناس من كتر الغيظ وم الخراب اللي ملوش حد
ياريت يعود تاني الزمان ويهل بالخير عليك وعليا
وان كنت عايز رأي تمام في الكلام اللفات ده بجد
دي كلها ارهصات أحلام يا همام يعني مجرد أمنية

صلاح منير
 مصر