#ايام زمان

مرحب شهر الصوم
*****************
أيام زمان لما كان
يهل علينا هلال رمضان
 كانوا الصبيان
بيمدوا الزينه على الحيطان

م الحيط للحيط
بيمدوا الخيط
فيه فرع الزينه ورق مربوط
ثلاثين ورقه ماسكها خيوط

شبيك لبيك يافانوس رمضان
يامنور طول الليل سهرأن
وشموعك قايده أشكال والوان
والكل بقدومك فرحان

وحوى  ياوحوى اياحه
سهرانه بتغنيها ف الساحه
ومافيش ولا نوم ولا راحه
ورمضان أيامه سماحه

ليل وايا نهار توبه واستغفار
تراتيل قرأن بعدها أذكار
ودعاء مآثور قبل الإفطار
تراويح وسحور قبل الانذار

والشيخ سيد ع الطبل يوماتى
يلف الدنيا غرب وشرق
ودايما قبل الفجر ليلاتى
ينقر طبله طق طقطاطقطق طق

اصحوا يانايمين اسمعوا كلاماتى
مسحراتي مطبلاتى ف البلد جوال
واسمعوا شى من امسياتى
الرجل تدب مطرح ماتحب واقول موال

مرحب مرحب شهر الصوم
جاى تأنسنا كده كام يوم
صيام وتعبد من غير نوم
مرحب مرحب شهر الصوم

م/محمد بدوى أبوالعلا