( كان )
بقلم ( أيمن نصر )
********************
كان جير دهان الحيطة
كانت حياتنا بسيطة
كان فيه هدوء مش زيطة
كان الصالون كراويتة.
...........................
كانت الحياة مبروكة.
كان كل الجيران مربوطة.
ببعضها مشبوكة.
كحبل في غزل فلوكة.
.............................
كانت التلاجه نمليه
والسفرة كمان طبليه
كان صاحبي صافي النيه
كان يسند يعلي فيه
.................................
كنت أقسم معاه المصروف
ولا ينسى أبداً معروف.
ويرد الجميل بألوف.
ويزعل عليه بخوف.
.............................
كانت سجادتنا كليم
كان كل قلب سليم
كان المصروف ملاليم
كان كل قلب حليم.
............................
كان البابور فيه جاز
مكنش فيه بوتاجاز
كان كل الصحاب عزاز
كل اللي صاحبهم فاز
...........................
كان الفانوس هزاز
وكان فيه قلوب ألماظ
كل اللي عاشرهم فاز
مكانش شيء يتعاز
..........................
كان شربنا م القله
كان أكلنا م الحله
كانت حياتنا فله
كان كل الأمور سهله.
..............................
كان فيه أمان ف الكون
كان الإيمان مسكون
كان كل صعب يهون
كان الشيطان مدفون
مكانش فيه تليفون .
..............................
كان فيه إيمان ف القلب
كان كل شيء يتحب
كان خير في كل درب
كان فيه إنسان ف الأرض .
بقلم ( أيمن نصر )
دمتم في رعاية الله.
تعليقات
إرسال تعليق