ما مغرور.. بس طبعي ثگيل
وبي دقيق الشور
ما مغرور.. وآنه البي حذر
ما كاشف المستور
ولا طبعي التكبر..
وابد ما مجبور
حتى امشي ابهواك
وأدخل المحذور
يل طينك حِماد
وطيني حر مفخور
وأنه العمري نهيته
وألك ظل منذور
يل سرك تغاضىٰ وعالشجر مشرور
وآنه أسرار روحي اندفنت ابشاجور
تنطق بالمذنب لو وصلها الجـور
وتحاذر كشفها... وتحچي بالمنظور
ما مغرور...
آنّـه وجاغ... دلَّه البيها گهوه اتفور
والضيف الشربها..
ايظل وفي ومسرور
ما مغرور...
بس عندي الطبع
نكران ذات أينور
بي واجب عليّه وابد ما مشكور
يل مايك سراب
وماييّ غذه ابحور
ما مغرور...
ريّض شوف طبعي اشلون
لو غث الزمان وگام بيك أيدور
صدگ... سد أصيرن... وأمنع المحظور
بقلمي...الشاعر حاكم الأسدي.. العراق
تعليقات
إرسال تعليق